Fri. Mar 29th, 2024

Alaa Alkhatib

علاء الخطيب

حفلة سمر من أجل المعارضجية السورية

20/04/2013

علاء الدين الخطيب

روى سعيد بن حسان، بعد جنيف2 ، قرر المناضلون السوريون عقد جلسة نقد على كاسة شاي خال من الكحول. وقبل أن يختلفوا نط الشيخ المالح وقال لهم: “من هلق يا اخوان انا افتتح الكلام فانا كبيركم، خلي بعينكم كم كيس ملح” فتغامز الشباب وهزوا الرؤوس مع ابتسامات سخرية.

الشيخ المالح افتتح الجلسة العظيمة، وبعد رشفة شاي قوية قال: “يا إخواني، أنا وين ما رحت بقولوا لي يا سيادة الرئيس، هههههه، والله أنا يعني ما بدي بس شو بدي اعمل، الوطن بده تضحيات واولادي والله والله ما عم يلحقوا ادارة اعمالي… نحنا انتصرنا يا اخوان وهذا الولد بشار لح نقلعه، سورية لها كبير (يضرب على صدره)… بس والله هالناس المعترين شو بدنا….. (عشردقائق والناس تتثاءب وغرق الشيخ المالح بالنوم فانفرجت الاسارير)

الشقفة(بصوت عالي): السلام عليكم ورحمة الله وبركاته يا إخواني الكرام. إن سورية التي ننشدها  قادمة إنشاءالله قوية حرة ديمقراطية عادلة. وسيعيد التاريخ حق الإخوان المسلمين بثورة 1979. عفوا أقصد حق الشعب السوري، لكن مثل ما بتعرفوا يا إخوان فالجماعة قدمت التضحيات والشهداء لسورية و…

رشيد يقاطعه: يا استاذ رياض، ليس الاخوان فقط من ضحى لسورية… الله عدل والعدل اننا ما ننسى المناضلين الاخرين، شو نسيتوا حزب التحرير الاسلامي و..

البيانوني: طبعا اخي الكريم عماد… استاذنا رياض لم يقصد نكران حق احد، وهو رايه الشخصي وليس راي الجماعة… ولا ننسى نضال الشيوعيين ايضا (غمزة وابتسامة لصبرا)حفلة سمر

صبرا: السلام عليكم ورحمة الله وبركاته وبارككم الرب.. أنا كشيوعي ما بعمري فكرت بالشيوعية إلا وأنا استلهم سيد قطب قبل ماركس فالثقافة العربية الاسلامية يا اخواني هي…

الخطيب: سامحوني يا اخواني… ممكن ندخل بموضوعنا مباشرة لان النقاشات الاخرى ستاخذنا بعيدا… نحن الان بهم اللحظة ولا بد ان نصل لتصور حول كلام بشار…. مو هيك يا جماعة؟

الاتاسي: اي والله يا شيخنا… خلينا نحكي بمقابلة مقصوف هالرقبة بشار… والله مش مصدقة متى تنتصر الثورة وبدي ارجع على البيت والف يبرق ويالنجة وما بدي لا سياسة ولا ماسة… انا برايي كامرآة سورية مثقفة كثير وبنت الأتاسي العظيم… انه حكي بشار الله يعدمني ياه ما في شي مهم…

غليون: هو.. معك حق مدام سهير، لكن نحنا يعني هيك لازم نناقش كلامه… لا ننسى انه يمثل العقلية الديكتاتورية الشمولية التي استصحرت العقلية العربية من خلال اصطهاجات تفاعل الصيرورة التاريخية بالعقلية الميتافيزيقية و….
(الجربا يميل على أذن الصباغ “شو قصده برهان ما عم افهم عليه” والصباغ بقول له “ليش هو فهمان شو عم يقول”)

علوش: يا إخوان، أنتو لاحظتوا كيف حكى المعلم عن الاقليات؟ هذا الولد يريد أن يعلمنا بدنا نعامل أهل الجزية والبدع… بس المهم أنه اعترف انه عدو لطويل العمر، قصدي للاسلام وهذا يعني..

الجولاني: وهذا يعني يا اخي اننا لازم نشغل جماعاتنا يكفروا كل واحد بيقول انا ديمقراطي… هيك منقول لهم “ديمقراطي.. آه… انت مع بشار” و..

صبرا: لا يا جماعة شو بدكم حزبي يتبرأ مني شو تكفروا الديمقراطية… وشو هيْ قصة الجزية…

الخطيب: نحن ووفق الاسلام الحنيف نعتقد أن الفكر التكفيري هو عمل غير جيد..

الشقفة (مع عبسة): لا يا اخ جورج… نحنا لن نكفر احد… ما بعمرنا عملناها… بس يعني الناس بدها تحكي، وكل شي بيقوله بشار هو كفر وخيانة… اما رسميا فنحنا ما لنا علاقة.

(صبرا يهز راسه متبرما)

الخطيب: بالواقع أن البعض يريد اختراق الثورة لان اخرين وقفوا بوجه أولئك. وإني أحذر من أهدافهم لانها تتلاقى مع بعض الجماعات من بعض الناس وبما أن …

غليون: يحرق حريشك يا شيخ معاذ كلامك مثل كلامي ما بينفهم منه شي.. هههههههه… بس يا جماعة لاحظتوا شو أنه خايف من الوهابية.. الظاهر خادم  الحرمين الله يطول بعمره سمّعه كم كلمة..

البيانوني: لا يا دكتور، هو خايف من دعم طويل العمر حمد وأمير المؤمنين أردوغان اللي قدموا كل ما يملكون للشعب السوري…

الجربا: شو قدموا بالله؟؟؟ أصلا أصلا لولا جلالة الملك آل سعود مدري شو كان صار فينا بسورية… الله سترنا… بعدين شو هاد المالح، ما سمع سمو فضيلة فخامة الامير فيصل عم يقول لي “سيادة الرئيس”… ضروري هلق نشغل الضرب واللبط….
الاتاسي (تضحك): اي والله .. اخيرا حكيت يا سيادة الرئيس الجربا… لولاهم كلهم مدري شو كان صار بالسوريين.. الله يخليهم لنا… وكمان لازم ندعي لفرنسا وامريكا

اللبواني: شو… هدول الغرب الكافر.. نحنا هلق عم نستغلهم… بعدين ما سمعتي كيف عم يشنعوا على جبهة النصرة؟؟ هم خايفين لان الجبهة بدها تحرر فلسطين.. بشان هيك ومن هلق ما حدا يتفزلك ويقول لي نرمي السلاح بس ينقبر بشار…

الخطيب: نحن نقول أن الإسلام تسامح ولا يوجد فريق له حق الاستئثار بسورية.. والتكفير ليس من شيمنا .. ومحاولات البعض مع البعض لن تغير موقف البعض

كيلو: كمال، هاد الحكي احكيه باسمك الشخصي.. ما تورطنا هلق مع امريكا… بعدين ما نحنا طابخينها سوا شو بنا؟ الجبهة جابها اردوغان وحمد.. والجولاني وعلوش فرخوا داعش.. وطلع بشار وبوتين اذكى منكم وحطوا ايدهم عليهم… وبكره لما نخلص لح يبعثوها لمحل ثاني… اعقل بقى وحاجتك تخبيص..

الشقفة: بالواقع الاخ كمال يتكلم باسمه الشخصي وليس براي الجماعة… قصدي المجلس… قصدي الائتلاف… والله ضيّعنا هاهاهاهاها….

صبرا: عفوا يا استاذتنا… يعني شو النتيجة النهائية بعد هذا الاجتماع المكثف… حاكم والله تعبنا وشكله الشيخ هيثم قرب يفيق..

كيلو: النتيجة واضحة، خاين اللي بيفاوض روسيا. بس نحنا لازم نستفيد من خبرتي السياسية ونفاوض روسيا والنظام بجنيف. ومثل ما قال تلميذي البروفسور غليون “روسيا عدو الشعب السوري”، بس رجع وشرحها بالمنطق المتباعد … انا لما حكيت مع شعبان، وشربت قهوة مع مملوك وبهدلتهم، برايي اننا ما في غير انا نكون واعيين وسياسيين … شو بقول لكم بتعملوا! واللي بيقول لا، بدي اشكيه للشيخ الجربا.

الاتاسي: الله يسامحك يا استاذ ميشيل بتحكي الكلمة وعكسها وما حدا بيفهم عليك؟؟ بما أني أنا السيدة الوحيدة بينكم وبالاعلام بيحبوا المرأة المثقفة انا اعلن النتجة: الله سورية حرية وبس… يلعن روحك يا حافظ… قوافل الشهداء تسير وتزيد من الشعب العظيم… يبعث له حمى المجتمع الدولي لانه ما عم يزودنا بالسلاح.. نحنا كثير منحب سورية والشعب السوري.

(تصفيق من الحاضرين وابتسامات، والمالح فاق من غفوته وبلش تصفيق)

أبو أحمد وهو عم يشيل كاسات الشاي عن الطاولة: الله يخليكم لنا يا اساتذتنا… والله عم تتعبوا كثير كرمال السوريين… بس يعني والله يا اساتذتنا انا ما فهمت منيح عليكم، شو يعني لح يصير اقول لاخي وعياله بالشام ينزحوا أو يضلوا بالبيت؟

كل البقية بضحكة عالية: الله يسامحك يا ابو احمد وعم تسالنا كمان… روح … روح اغسل كاسات الشاي ولا بقى تعيدها.

20/04/2013